Вёска Жырмуны на працягу 15ст. уласнасць Бутрымаў і Кучукаў. З 1513г. перайшла да Юрыя Радзівіла. У 17ст. уласнасць Завішаў. У пачатку 18ст. зноў належыць Радзівілам.

У 1788-1789гг. па фундацыі Караліны Радзівіл у цэнтры вёскі на месцы ранейшага храма быў пабудаваны драўляны касцёл – помнік архітэктуры класіцызму. Захаваўся па сённяшні дзень у сваім першапачатковым выглядзе. Узведзены паводле праекта бацькі вядомага архітэктара-класіцыста Карла Падчашынскага – Яна Падчашынскага, вучня знакамітага прафесара архітэктуры Віленскага універсітэта Лаўрына Гуцэвіча. Архітэктар імкнуўся ўвасобіць у дрэве формы мураванай архітэктуры, што праявілася ў нязвыклай для драўлянага дойлідства арачнай форме вокнаў, імітацыі пілястраў. Галоўны фасад аздабляюць мураваныя элементы – дзве калоны, якія падтрымліваюць франтон.Тая ж стылёвая арыентацыя адчуваецца і ў інтэр’еры храма.Галоўны алтар мае відавочныя рысы класіцызму, як і ўся пабудова.