Тэатральная залa
У сярэдзіне XVIII ст. у рэзідэнцыі Радзівілаў быў створаны першы ў Беларусі прыдворны тэатр. Для тэатральных прадстаўленняў Францішкі Ўршулі Радзівіл у сярэдзіне XVIII ст. была абсталявана зала ў стылі ранняга класіцызму з элементамі ракако. Другое дыханне тэатр набыў у чацвертай чвэрці XVIII ст., калі нясвіжскім ардынатарам быў Караль Станіслаў Радзівіл Пане Каханку. У гэты час пашырыўся склад капэлы, адрадзіліся балет і оперная трупа. Нясвіжскі прыдворны тэатр існаваў каля 70 год – да 1809 г. У гэтым жа памяшканні Караль Станіслаў Радзівіл у 1784 г. прымаў апошняга караля Рэчы Паспалітай Станіслава Аўгуста Панятоўскага, адсюль другая назва залы – Каралеўская.