Арсенал Нясвіжскага замка
Арсенал – будынак, дзе захоўваецца ваенная амуніцыя і замкавае ўзбраенне. Арсенал Нясвіжскага замка быў узведзены ў канцы XVI- XVII стст. Уздоўж сцен пабудовы на спецыяльных драўляных падстаўках размяшчалася ручная агнястрэльная зброя, у сярэдзіне стаялі лёгкія гарматы і марціры на лафетах. Цяжкая зброя заставалася на бастыёнах. На працягу XVII ст. арсенал налічваў каля трыццаці гармат, большасць з якіх былі адліты пры Мікалае Крыштофе Радзівіле Сіротку. Найбольш знакамітай стала серыя гармат, адлітая ў канцы XVI ст. у Нясвіжскай людвісарне Германам Мольцфельдам, зброя якой адрозніваецца сваімі мастацкімі якасцямі. У экспазіцыі залы прадстаўлены копіі двух гармат з гэтай серыі – Вінаград і Цэрбер. На абодвух гарматах – удрукаваныя ў вытанчаны раслінны і міфалагічны ўзор фамільныя княжацкія гербы Радзівілаў. Шырока прадстаўлены ў экспазіцыі ручная агнястрэльная зброя – гакаўніцы, мушкеты, пісталеты.