Нясвіжскі архіў рода Радзівілаў – найбольш буйны сярод прыватнаўласніцкіх архіваў Беларусі. Ён быў закладзены Мікалаем Крыштофам Радзівілам Сіроткай у другой палове XVI ст., а дасягнуў свайго росквіту пры яго нашчадках у XVII-XVIII стст. У сярэдзіне XVI ст. Радзівілы атрымалі права на вечнае захаванне ў нясвіжскім архіве другога экземпляра Літоўскай Метрыкі, дзяржаўных актаў і гаспадарчых дакументаў, пачынаючы з часоў канца XIV ст.

Бібліятэка Радзівілаў у Нясвіжы – адзін з найбольш вядомых гістарычных кнігазбораў Беларусі. Дзякуючы шырокім культурным сувязям Радзівілы камплектавалі бібліятэку рукапісамі і выданнямі, якія прывозілі з Еўропы, кнігамі з друкарняў ВКЛ і ў тым ліку ўласных друкарняў у Нясвіжы і Брэсце. У ХІХ ст. была створана новая бібліятэка, якая дапоўнілася кніжнымі зборамі зачыненых манастыроў і берлінскай бібліятэкай Радзівілаў. Інтэр’ер залы архіва і бібліятэкі адноўлены на канец ХІХ ст.