Зала гісторыі будаўніцтва і рэканструкцыі замка Каменны замак Радзівілаў быў узведзены ў канцы XVI ст. пад кіраўніцтвам Джаванні Марыі Бернардоні. Асноўную забудову замкавага дзядзінца на пачатак XVIІ ст. складалі ўяздная брама з высокай гадзіннікавай вежай, цэнтральны корпус, камяніца, а таксама напалову драўляная пабудова арсенала. У час рэканструкцыі замка ў XVIІІ ст. была перабудавана галерэя з заламі архіва і бібліятэкі; быў дабудаваны чацвёрты паверх палаца і палацавая капліца.

Пасля Другой сусветнай вайны палац выкарыстоўваўся ў якасці прафсаюзнага санаторыя. За гэты час будынак палаца здралеў, многія элементы дэкору былі знішчаны. У 2004 г. распачаліся поўнамаштабныя рэстаўрацыйныя работы, якія скончыліся афіцыйным адкрыццём палацавага ансамбля ў 2012 г. У ліпені 2005 г. архітэктурна-культурны комплекс рэзідэнцыя рода Радзівілаў у Нясвіжы быў уведзены ў спіс Сусветнай спадчыны ЮНЕСКА.