Касцёл Унебаўзяцця Найсвяцейшай Дзевы Марыі У цэнтры вёскі. Пабудаваны ў 1700 г. з дрэва на месцы касцёла, заснаванага ў 1601 г. польскім каралём Жыгімонтам ІІІ (парафія заснавана ў 1490 г.)Першы інвентарны вопіс касцёла складзены ў 1782 г.2 У 1808 г. пры касцёле пастаўлена новая драўляная плябанія3. К сярэдзіне 19 ст. храм прышоў у аварыйны стан4. У 1887 и 1898 гг. адноўлены без страты першапачатковага архітэктурна-стылёвага вобліка5. На 1886 г. налічвалася 1242 парафіяніна, на 1895 г. - 841, на 1997 г. - 1930. Адноўлены ў 1898 г. -- нанава ашаляваны без парушэння барочнай стылёвай першаасновы. У 1992 г. капітальна адрамантаваны. Прыпісная капліца ў в. Падліпкі.

Помнік манументальнага народнага дойлідства з рысамі стылю барока. Узведзены па канону 3-нефавай базілікі. У аснове будынка -- прадаўгаваты і высокі прамавугольны зруб цэнтральнага нефа з 5-сценнай апсідай, накрыты вальмавым дахам з ківорыем (шатром) фігурнай барочнай формы. Яруснае нарастанне ствараецца больш нізкімі бакавымі нефамі і кароткімі крыламі трансепта пад 1-схільнымі дахамі. Іх дынамічны рух узмацняецца вертыкальнай шалёўкай і брусамі-сцяжкамі па баках высока ўзнятых арачных вокнаў-біфорыумаў.

Унутраная прастора, падзеленая дзвюма 5-слуповымі аркадамі на 3 нефы, мае глыбінна развітую, падоўжана выцягнутую кампазіцыю. Ансамбль з 5 драўляных алтароў -- магутны мастацка-дэкаратыўны акорд у лапідарнай па архітэктуры малітоўнай зале. Архітэктоніку 2-ярусных алтароў утвараюць карынфская каланада, разарваныя антаблементы, прафіляваныя карнізы, якія арганічна спалучаюцца з круглай драўлянай скульптурай і ажурнай арнаментальнай разьбой. Ёй акаймаваны шырокафарматныя алтарныя абразы. На сценах залы навешаны 12 стацый з цыкла "Крыжовы шлях Хрыста" (гіпсатура, 19 ст.). На выступаючай і адкрытай у залу вялікай аркай 3-граннай галерэі хораў устаноўлены арган, дэкарыраваны барочным франтонам. На левым слупе прэсбітэрыя навешаны гранёны амбон.

У канцы 19 ст. касцёл абкружаны бутавай агароджай з брамай у выглядзе гатычнай 3-пралётнай стральчатай аркады. Каля яе ў 1877 г. ўзведзена мураваная званіца, трактаваная ў суровых крапасных формах: глухія сцены 4-граннай вежы пад нізкім шатровым дахам толькі ў верхнім ярусе-звоне прарэзаны лучковымі праёмамі6. Побач з храмам надмагілле са скульптурай Хрыста.