Калекцыйны кабінет “Слуцкія паясы”
З’яўленне слуцкіх паясоў было выклікана запатрабаваннямі моды на шыкоўныя рэчы з усходнім каларытам, усплёск якой прыпаў на другую палову XVIII ст. Да сярэдзіны XVIII ст. ваўняныя і шаўкавыя паясы ўвозіліся ў Рэч Паспалітую з Турцыі і Персіі і гандаль імі быў вельмі выгадным. Аднак з часам з’яўляюцца прадпрыемствы па іх вырабу і ўнутры краіны. Міхал Казімір Радзівіл Рыбанька заснаваў у Слуцку і Альбе мануфактуры па вырабу шаўковых кунтушовых паясоў. З цягам часу паясы слуцкай мануфактуры заваявалі еўрапейскае прызнанне. У Нясвіжскім замку існавала вельмі багатая калекцыя слуцкіх паясоў і паясоў слуцкага тыпу. Вопіс маёмасці замка 1939 г. зафіксаваў 32 паясы высокай мастацкай каштоўнасці, змешчаных ў Рыцарскай (Залатой) зале. Пасля падзеяў Другой сусветнай вайны калекцыя была згублена і яе далейшы лёс невядомы.